धनकुटा, पौष – २८
राष्ट्रिय दलित पत्रकार संघ कोशी प्रदेश समितिको प्रथम अधिवेशनले नयाँ कार्यसमिति चयन गरेको छ।
पौष २६ र २७ गते धनकुटाको छथरजोरपाटी गाउँपालिकामा सम्पन्न अधिवेशनले किशोर विश्वकर्माको अध्यक्षतामा नयाँ कार्यसमिति गठन गरेको हो।
अधिवेशनले अनिता रसाइली र मेनुका विश्वकर्मालाई उपाध्यक्षमा चयन गरेको छ भने राकेश नेपाली सचिवमा, मिन्टु दास सहसचिवमा, र लिला घिमिरेलाई कोषाध्यक्षमा चयन गरेको छ। समितिको सदस्यमा खेममाया शिवा, चिरञ्जीवी शंकर, आयुष्मा शंकर, सुनिता रसाइली, नरेष खाती, र भुपाल सुर्खेती चयन भएका छन्।
यस अधिवेशनले दलित समुदायका समस्या र मुद्दालाई प्राथमिकतामा राख्दै अघि बढ्ने प्रतिबद्धता व्यक्त गरेको छ। नवगठित कार्यसमितिले समुदायका समस्याहरूको सम्बोधन गर्न र सामाजिक न्याय सुनिश्चित गर्न सक्रिय भूमिका खेल्ने लक्ष्य राखेको छ।
कार्यक्रममा सहभागीहरूले दलित समुदायका पत्रकारहरूलाई मिडियामा थप सक्रिय र प्रभावकारी बनाउने आवश्यकतामा जोड दिएका छन्। पत्रकारिता क्षेत्रबाट दलित समुदायका मुद्दाहरूलाई उजागर गर्न र समाजमा समानता कायम गर्न भूमिका खेल्न संघले विशेष योजना अघि बढाउने बताइएको छ।
अधिवेशनमा प्रदेशभरका दलित पत्रकारहरूको उपस्थिति रहेको थियो। अधिवेशनले समुदायका समस्या, अवसर, र चुनौतीबारे गहन छलफल गर्दै आगामी कार्यदिशा तय गरेको छ। दलित पत्रकारहरूको सशक्तिकरण, उनीहरूको क्षमता अभिवृद्धि, र अवसरहरूको सिर्जना गर्न संघले विशेष योजना अघि सार्ने योजना बनाएको छ।
नयाँ कार्यसमितिले अबका दिनमा प्रदेशभरिका पत्रकारहरूसँग सहकार्य गर्दै समाज परिवर्तनमा योगदान पुर्याउने लक्ष्य लिएको छ।
