मोरङको उर्लाबारी–५ मा रहेको अरनिको हस्पिटलमा आधुनिक सीटी स्क्यान सेवा सञ्चालनमा आएको छ।
४ करोड रुपैयाँ लागतमा अत्याधुनिक सीटी स्क्यान मेसिन जडान गरी सेवा औपचारिक रूपमा सुरु गरिएको हो। आज आयोजित समारोहमा स्वास्थ्य तथा जनसंख्या मन्त्री प्रदीप पौडेलले सीटी स्क्यान सेवाको औपचारिक उद्घाटन गर्नुभएको हो। उहाले निजी क्षेत्रको लगानीमा यति स्तरीय स्वास्थ्य सेवा विस्तार हुनु सकारात्मक पहल भएको उल्लेख गर्दै यसले सर्वसाधारणलाई गुणस्तरीय स्वास्थ्य सेवा प्राप्त गर्न सहयोग पुग्ने विश्वास व्यक्त गर्नुभएको छ।
सो अवसरमा अरनिको हस्पिटल प्रा.लि.का अध्यक्ष लोलिम पोमुले हस्पिटललाई चरणबद्ध रूपमा विस्तार र बिकास गर्दै लैजाने योजना रहेको बताउनु भएको छ। हाल ५० शैयाको सेवा दिइरहेको हस्पिटललाई १०० सैया क्षमतामा पुर्याउने योजना रहेको पोमुले बताउनु भएको छ। यसैबीच, हस्पिटलले मुटु रोग उपचारका लागि क्याथल्याबको तयारी गरिरहेको छ भने न्यूरोसम्बन्धी सम्पूर्ण सेवा पनि छिट्टै सञ्चालनमा ल्याइने जनाइएको छ। विराटनगर बाहिरको निजी अस्पतालमा पहिलोपटक ४ करोड रुपैयाँ मूल्यको सीटी स्क्यान मेसिन स्थापना हुनु हस्पिटलका लागि मात्र नभई यस क्षेत्रका बिरामीहरूका लागि पनि महत्वपूर्ण उपलब्धि मानिएको छ।
