उर्लाबारी । सरकारले मंसिर ४ गते प्रतिनिधी सभा तथा प्रदेश सभाको निर्वाचनको मिति घोषणा गरेको छ । सरकारको निर्वाचन मिति घोषणासंगै दैशभरिको राजनीतिक सरगर्मी बढ्न थालेको छ । विभिन्न राजनीतिक दलहरुका उम्मेद्वाराहरु चुनावी रसाकस्सीमा उत्रन तथा कतिपय स्वतन्त्र व्यक्तिहरुले उम्मेद्वारी दिने घोषणा गरिसकेका छन् ।
निर्वाचनको मिति घोषणासँगै केन्द्रीय राजनीतिमा प्रभावशाली पहिचान बनाएका व्यक्तिहरुको प्रतिनिधिसभा र प्रदेशसभा सदस्यका सम्भावित उम्मेदवारहरुको चर्चा सुरु हुँदै गएको छ । स्वतन्त्र युवाहरुले प्रतिनिधित्व गर्नुपर्ने मागहरु उठिरहेको अवस्थामा युवा ठगेन्द्र न्यौपानेले पनि मोरङ क्षेत्र नं. २ बाट प्रतिनिधिसभा सदस्यमा उम्मेद्वारी दिने घोषणा गर्नुभएको छ ।
अब पालो युवा जमातको हो, भन्दै अब देशको मुहार युवाले फर्ने हो । युवाले इतिहास रच्ने तथा राजनीतिक रुपमा युवा जमातले देशलाई अगाडि बढाउन आफूले उम्मेद्वारीको घोषणा गरेको र मंसिर ४ को निर्वाचनमा आफ्नो दावी रहेको न्यौपानेले बताउनुभयो ।
कृषि अभियान्ता न्यौपानेले जनताको चाहना तथा युवा जोस् र जागरलाई सदुपयोग गर्नको निम्ति उम्मेद्वारी दिने जमर्को गरेको बताउनुभयो । चार बर्ष दक्षिण कोरिया बसेर फर्किनुभएका ठगेन्द्रले आफ्नै गाउँघरको माटो सुम्सुम्याउँदै २०७६ देखि कृषि कर्ममा नयाँ क्रान्तिको सुरु गर्नुभयो । स्थानीय युवाहरुलाई सहभागी गराएर अभियानकै रुपमा सामुहिक खेतीपातीको नेतृत्व गरिरहनुभएको छ, उहाँले । बैदेशिक रोजगार समन्वय समिति रतुवामाई नामको संस्थामा आबद्ध भएर ठगेंद्रको अगुवाइमा व्यवसायीक कृषि थालेका युवाहरु अहिले स्थानीय बजारमा आफ्ना उत्पादनहरु बिक्री गरिरहेका छन् ।
ठगेन्द्रको अभियानले पढेलेखेका र देशविदेश घुमेका युवाहरु समेत बजारमा आफ्ना उत्पादनहरु बेच्न थालेका छन् । यो अभियान देखेपछि अन्य युवाहरु पनि उत्प्रेरित हुन थालेका छन् । ३ बिगाहा क्षेत्रफलबाट सुरूवात गरिएको खेती यतिबेला ३० बिगाहा क्षेत्रफलमा संचालन भइरहेको छ । सामान्य कुट्टो कोदालो र स्थानीय श्रमिकको प्रयोग गरी कृषि अभियान सुरु गर्नुभएका न्यौपानेको अभियानले यतिबेला सार्थकता पाएको छ ।
कृषि उत्पादनलाई बृहत पार्न उहाँले अभियानमार्फत नयाँ प्रविधिको समेत प्रयोग गर्दै आउनुभएको छ । अभियान मार्फत सञ्चालित आधुनिक मेसिन र औजार स्थानीय कृषकलाई सहुलियत दरमा प्रयोग गर्न दिइरहनुभएको छ । कृषि क्रान्ति र युवा स्वरोजगार मार्फत देश उन्नति तर्फलाग्ने घारणा राख्ने न्यौपानेले बार्षिक १५ लाखको बराबरको श्रमिकको प्रयोग गर्दै आउनुभएको छ । कृषि क्रान्तिसँगै सामाजिक गतिविधिमा पनि सक्रिय रहनुभएका न्यौपाने यस पटक मोरङ क्षेत्र नं. २ बाट प्रतिनिधित्व गर्दै संसदमा छिर्ने दाउमा हुनुहुन्छ ।